搜身
古惑仔東燦x警察東植
通篇都是粵語口語(･･;)就這種比較港的au還是口語夠味哈哈哈⋯寫的時候挺好玩的x
很短很短，我試試水
---
酒吧。
「等陣，入我地場要搜身㗎。」企係一邊嘅古惑仔聚埋一齊攔住半只腳踏咗入門口嘅陸東植。
陸東植眼眉一挑，「喂，嚟咁多次，第一次聽呢條規矩喎，老作啊？」
「燦哥啲場不嬲都有呢個規矩！嚟過點會唔知？山草藥呀噏得就噏。」
乜規矩啊？陸東植第一次俾人係自己細佬嗰場攔，條氣有少少唔順。「借歪啦，係度阻住晒。阿燦係我細佬嚟㗎，咁唔俾面？」
「嚇，你大我呀？鬼唔識！我仲係你老竇添！」嗰古惑仔串返佢。
雙方僵持不下。氣氛都幾尷尬⋯⋯
「哇，塞住嗰門口點做生意呀？」人未到，聲先到。陸東植一聽就知係邊嗰，佢都未開口講嘢，其中一個古惑仔就爭住講：「燦哥！你嚟得啱啦，」佢指住東植「有個人唔跟規矩又要入嚟，仲睇唔起你添⋯⋯實係嚟攪事㗎啦。」
陸東燦望咗嗰個「攪事嘅人」一眼，心情即刻好到好似中咗六合彩咁。
「陸sir！」陸東燦笑笑口行過去，攬住東植搏頭。「今晚咁好興致落我度挽呀？」
陸東植冇好氣：「喂，咩興致都冇啦依家。」佢撇咗陸東燦一眼「你班嚫呀，真係同你一樣咁生性。」
「乜事咁嬲呀？」
「冇，企係度咗幾分鐘，無厘啦間多咗個老竇咁款啫。」
「嘩，邊嗰咁巴閉？」陸東燦即刻睥實班人：「啱啱邊嗰大大聲聲話要做佢老竇？」
條𡃁仲未反應過嚟陸東植係咩人，淨係醒起燦哥教佢哋敢做就敢認，坦坦蕩蕩咁企咗出嚟。「係我，乜事呀大佬？」
「你話，又點會咁啱得咁巧，我同呢位o記陸sir有同一嗰老竇呢？」陸東燦講。
嗰𡃁仔聽到冷汗都出埋嚟，今次真係禍從口出⋯⋯佢即刻自打嘴巴：「對唔住陸sir，係我貪一時口快⋯⋯應該係我做你嗰仔。」
陸東燦聽到都笑。
「開心返未？」佢問東植。「算啦，唔好同佢哋計較啦⋯⋯呢班嚫都係前幾日收新收㗎，懵剩剩咁，口笨又唔識變通。之前守開場嗰個呢排又出咗去做嘢，唔係我使乜佢哋企係度啫⋯⋯你話係咪囉？啲新仔人都唔認得多個。」
陸東植唔出聲，東燦就係咁想惹佢笑。「唔好嬲啦，依家仲多咗嗰仔喎。嚟啦，笑返件。」
「妖！」東植送件白眼比佢。「我啲仔好似你咁叻呀，我丟佢落街啊。你講還講，咪亂摸！⋯⋯入得去未呀。」
「入得，入得。」陸東燦笑住講。跟住對啱啱出嚟條嚫揮揮手：「喂，阿仔，過嚟搜老竇身。」
「陸東燦⋯⋯玩嘢呀？」陸東植不滿，又兇嗰個行過黎嘅古惑仔：「喂，唔好郁手郁腳！」
「出嚟行牙齒當金使㗎嘛。放你一個，日後其他大佬過嚟玩咪當我冇料到？」陸東燦放開佢，嬉皮笑臉個樣冇咗：「嚫仔，做嘢！」
做細嘅俾人擺上檯，好難做嘎⋯⋯但係大佬開口，佢點可以避？啱啱嗰古惑仔諗。佢只好硬住頭皮去搜阿sir身。
「大佬，乾淨㗎。」好唔容易頂住嘅便宜老竇要殺人嘅眼神搜完，接著燦哥嘅一句「我望住你咁呢嗰搜法唔係好掂喎。」又嚇到佢心都吊起。
陸東燦見條𡃁面都青埋，擺擺手叫人行開。「算啦，都係我嚟啦⋯⋯你呀，醒定啲學嘢啊。」
陸東燦搜得有模有樣咁。
「喂，得了喎，抽夠水未？」陸東植按住東燦係佢心口摸來摸去嘅手。「成身上下都冇收嘢啊，我點會咁玩你呀。」
「講唔定㗎嘛，我幾驚警察叔叔你收埋啲粉係身然後屈我賣粉呀。前幾日有條女想入嚟賣丸仔，啲貨⋯⋯佢收埋係個bra到呀。我點知你會唔會咁玩我？」陸東燦個樣一啲都唔似開玩笑。陸東植按唔實佢，反而比佢借機解咗襯衫上面嘅鈕。
「你都痴線。」陸東植講。「邊有男人著bra？」
陸東燦對佢笑咗笑，「我點知呢？」不過你個胸咁大，可能著起都幾啱身。東燦突然諗。
不如下次玩下⋯⋯算，都係唔好下次了，就今晚啦。
陸東燦諗緊啲污糟嘢，唔出聲，表情就特別認真。陸東植幾乎以為係自己諗多咗。結果嗰死仔包摸摸索索，又搭上某啲重點部位。「阿sir你枝槍都幾大碌喎。」陸東燦講。「至弊就驚陣間一覺唔覺意走火，俾人投訴我到有差佬持械傷人呀。」
「玩夠未？」陸東植問。
「玩乜啊，我認真㗎。」
得，你地頭你大嗮，陸東植諗。忍囉，仲可以點？
「陸sir都幾乾淨下喎⋯⋯」陸東燦講，「不過都係差少少⋯⋯」
「咩⋯⋯？！」陸東植話仲未講完，個死仔包就當住咁多人嘅面開始嘴佢。
叼！佢永遠唔識分場合嘅喎，依家你開酒吧定係開色情場所啊大佬⋯⋯企係門口到做活招牌攬客啊？陸東植掙扎唔開，直接咬咗東燦一啖。
「你kai㗎？陸東燦我平時縱壞你？依家連場合都唔識得分？成班人睇住㗎！」陸東植火滾。
「冇，正常程序啫。睇下你有冇收埋嘢係把口到啫，你嬲啊？」陸東燦又變返嗰幅乖乖仔嘅樣，對住佢笑。
笑笑笑，一日就識得笑。以為咁就可以算數？「冇大冇細！」陸東植掙扎開佢，「得，你講，你搵到乜？講得出今鋪我唔計你數！」
「刀片囉，你睇下，割到嘴都流血呀。」東燦指住俾佢咬出嚟嘅傷口。激到陸東植一口氣梗住，論口頭功夫，佢同個細嘅真係冇得比。
陸東燦見阿哥嘢又講唔出，開始係度用眼神屌人就好笑，知佢心入面唔啹。「算啦，我講笑咋，我錯我錯⋯⋯入嚟啦。」佢心諗陣間執返兩劑實冇嘢⋯⋯呢招氹東植簡直一流，唔係講笑。邊次唔係do返幾次就好返？
看門口嘅幾條𡃁望住大佬入場嗰背影仲懵懵地，過咗一陣先有人講：「我第一次知仲要搜咪嗰口嘅喎⋯⋯」
评论(13)